ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានប្រកាសចេញវិញ្ញាបនបត្រចុះបញ្ជីគម្រោងវិនិយោគដល់រោងចក្រចំនួន៩នៅក្នុងរាជធានីភ្នំពេញ ខេត្តកណ្តាល កំពង់ស្ពឺ និងខេត្តព្រះសីហនុ ដែលមានទឹកប្រាក់សរុបប្រមាណ ៤៣លានដុល្លារអាមេរិក ហើយអាចបង្កើតការងារជូនដល់ប្រជាពលរដ្ឋក្នុងស្រុកប្រមាណ ១ម៉ឺន១ពាន់នាក់។

ក្រុមប្រឹក្សាអភិវឌ្ឍន៍កម្ពុជា (CDC) ឱ្យដឹងកាលពីថ្ងៃទី១២ ខែមករា ឆ្នាំ២០២២ថា គម្រោងទាំង៩នោះរួមមានរោងចក្រកាត់ដេរសម្លៀកបំពាក់ចំនួន៤ ដែលមានទីតាំងនៅរាជធានីភ្នំពេញ និងខេត្តកណ្ដាលដែលអាចផ្ដល់ការងារជូនពលរដ្ឋបានជាំង៥ពាន់៤រយកន្លែង និងរោងចក្រផលិតកាបូបចំនួន៣ដែលមានទីតាំងនៅក្នុងខេត្តកំពង់ស្ពឺដែលផ្ដល់ការងារជាង៣ពាន៨រយកន្លែង។

ចំពោះគម្រោងចំនួនពីរទៀតស្ថិតក្នុងតំបន់សេដ្ឋកិច្ចពិសេសនាខេត្តព្រះសីហនុ ដែលខាងគណៈកម្មាធិការតំបន់សេដ្ឋកិច្ចពិសេសកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចចេញវិញ្ញាបនបត្រចុះបញ្ជីជាគម្រោងវិនិយោគរួមមានរោងចក្រផលិតកេសកាតុងនិងផលិតផលប្លាស្ទិក និងរោងចក្រផលិតសម្ភារៈសត្វចិញ្ចឹមដែលអាចបង្កើតការងារបានជិត២០០កន្លែង៕